६१.

काय काढावे कोणाचे

उणेदुणे कोणापाशी;

तूच कितीक चांगला

जरा विचार मनाशी.

६२.

नको म्हणू कवितेला

फक्त यमकांचा खेळ;

शब्दाशब्दातून मिळे

मला जगण्याचे बळ.

६३.

तुम्ही शिकविली भाषा

तुम्ही घडविला पिंड;

शब्दाशब्दातून आता

अर्थ वाहतो उदंड.

६४.

पैशापैशाचा हिशेब

ज्याने वहीत लिहिला;

एक पैसाही सोबत

नाही मढ्यावर नेला.

६५.

कोण आहे बरोबर

काय कोणाचे चुकले;

याच वांझोट्या चर्चेत

सारे आयुष्य हुकले.

६६.

आले किती गेले किती

नाही फरक पडत;

कोणावाचून जगाचे

काही नसते अडत.

६७.

तळ हाताने झाकतो

सूर्य आपल्यापुरता;

लोक वाचतात पण

त्याच्या प्रकाशाची गाथा.

६८.

भल्या पहाटे ऎकावी

उंच स्वरात अजान;

सायंकाळी आरतीला

बंद करू नये कान.

६९.

तुझ्या अमृताची वाटी

थोडी सांडू दे ताटात;

चूकभूल माणसांची

घाल प्रेमाने पोटात.

७०.

तुझे उपकार माये

मला फेडू दे वो थोडे;

तुझ्या पायात घालू

माझ्या कातड्याचे जोडे.