४९.
नको नको लावू बाई
असा कपाळाला हात;
कर जरा हसून तू
माझी सुंदर प्रभात.
५०.
असा सुखाचा संसार
वाटे शेजार्‍याला हेवा;
नाही आणखी मागणे
तुझ्या पायापाशी देवा.
५१.
सहवासात कितीक
उजळले क्षण-क्षण;
दिस,मास,साल गेले;
गेली नाही आठवण.
५२.
पायी लावून तुक्याच्या
माळ घातली गळ्यात;
मला दिसली जिजाई
तुझ्या गहिर्‍या डोळ्यात.
५३.
तूच झाली इंद्रायणी,
तूच अभंगाची वही;
माझा बुडाला दगड
तुझी तरली पुण्याई.
५४.
ओळ दिव्यांची उजळे
घरादाराचा कोपरा;
तनामनात सांडतो
लख्ख प्रकाश हासरा .
५५.
इवल्याशा पणतीने
दूर पळतो अंधार;
लढणार्‍या माणसाला
देते शुभेच्छा आधार.
५६.
नाही थांबविता आला
मला घड्याळाचा काटा;
अनवाणी पायांपुढे
माझ्या होत्या बारावाटा.
५७.
ताडामाडासारखा तू
जाई उंच गगनात;
खुरटल्या बाभळीला
नको आणू तू मनात.
५८.
एक दिसाचा अबोला
वाटे लोटलं वरीस;
अरे मरण चांगलं
अशा जगण्यापरीस.
५९.
सार्‍या जगाचा संताप
तुझ्यावर मी काढला;
तरी नेमाने ताटात
घास प्रेमाचा वाढला.
६०.
काय कोणाला सांगावे?
काय कोणाला कळेल?
दृष्टी एकमेकांकडे
पुन्हा आपली वळेल.
याची सदस्यत्व घ्या:
पोस्ट (Atom)
