२३.
दोन मने झाली एक
त्याला प्रेम असे नाव;
एकतर्फी वासनेला
फ‍क्‍त शरीराची हाव.
२४.
तुझाविन माझे सख्या
नाही पानही हालत;
अडखळते पाऊल
नाही एकटे चालत.
२५.
टाकले मी मायबाप,
भाऊ-बहीण सोडले;
तुझ्या एका जीवासाठी
माझे माहेर तोडले.
२६.
एक सोन्याचे डोरले,
चार काळे काळे मणी;
कच्च्या धाग्यात दुहेरी
दोन जिवांची गुंफणी.
२७.
गळाभर गळसरी
तुटू नको देऊ बाई;
तोच जिवाला आधार
सुटू नको देऊ बाई.
२८.
जिच्या गालावर खळी
तीच पतीची लाडकी;
तिच्या संसारात सुखी
रिती गाडगी-मडकी.
२९.
नाही रुतू दिले काटे
झाली पायात वहाण;
बोटभर कुंकासाठी
जन्म टाकला गहाण.
३०.
असो करोडपती गं
जिचा तिला लखलाभ;
लाभो कुंकवा आयुष्य
माझा एवढाच लोभ.
३१.
डोक्यावरून पदर,
तुझ्या ओंजळीत दिवा;
उजळल्या चेहर्‍याने
किती बरे वाटे जिवा.
३२.
नको पूजा,नको पोथी,
नको व्रत,नको तीर्थ;
नाही नांदती लक्षुमी
तेथे नारायण व्यर्थ.
याची सदस्यत्व घ्या:
पोस्ट (Atom)
