सखी,प्रेयसी,अर्धांगी
एक होऊन आलीस;
तूच राधा,तूच मीरा,
तूच रुक्मिणी झालीस.
२.
माझ्या अंगणात होते
तुझे पाऊल पडत;
वाटे अचानक आले
पान सोन्याचे उडत.
३.
नेते गुलाबी ओढणी
मन ओढत ओढत;
तिची साधीसुधी गाठ
नाही पिच्छाच सोडत.
७.
दाराहून येता जाता
भेटीगाठीचा बहाणा;
वेडा होतोच शेवटी
इथे कुणीही शहाणा.
९.
तुझ्या हासण्याने होते
माझी साजरी दिवाळी;
तुझ्या रुसण्याने चेते
माझ्या उरामधे होळी.
१०.
साध्या साध्या बोलातून
तूच साखर पेरली;
माझी चळती नजर
तूच अचूक हेरली.
११.
भले बुरे दाखवण्या
तूच आरसा झालीस;
डोळ्यांपुढे असूनही
नाही लक्षात आलीस.
१२.
कोर्या कागदावर तू
नाव लिहिले कोणाचे;
याच कल्पनेने झाले
लाख तुकडे मनाचे.
१३.
मन मोकळे करण्या
होते तुला भेटणार;
रीतिरिवाजांचे पण
गेले आडवे मांजर.
१४.
नको सोसू तू मुक्याने
घाव होऊ दे बोलका;
होतो बोलता बोलता
भार दु:खाचा हलका.
१५.
तुझ्या मनातला सल
टाक सांगून एकदा;
आज ठेवू नको गडे
तुझ्या-माझ्यात पडदा.
१६.
वाट पाहिली पत्राची
डोळे लावून वाटेला;
युग लोटले वाटते
तुझ्या मागच्या भेटीला.
१७.
तुझ्या मनाचा कागद
माझ्या आसवांची शाई;
पत्र लिहिले असे की
कोणी वाचणार नाही.
१८.
चार बोटांचा चिटोरा
दोन मनाला जोडतो;
साताजन्माचा आनंद
एका क्षणात मिळतो.
१९.
तुझ्या हाती सुईदोरा,
माझे पाऊल अडले;
माझ्या शर्टाने बटन
तेव्हा जाणून तोडले.
२०.
गेला डोळ्यात कचरा
तूच घातली फुंकर;
साधीसुधी तू पार्वती
तुझा भोळा मी शंकर.
२१.
कधी टपोर आवळे,
कधी चिंचा, कधी बोरं;
आंबटशा आठवणी
गोड लागतात बरं.
२२.
माझ्या हृदयात तुझे
असे जाणवे स्पंदन;
जसे गाभार्यात कोण्या
तेवणारे निरांजन.
© Blogger templates Shiny by Ourblogtemplates.com 2008
Back to TOP